糝了砂糖的屎

今仔今年已經好少講香港政治,因為香港已經冇得救,唯有隻眼開隻眼閉.但最近曾特狗落台前都要急於推行既所謂"替補機制",真係睇到今仔眼火爆.

雖然土共當奴曾特狗近期已經自動摺埋一二角諗住捱埋餘下任期,點知阿爺臨尾都要落order,要公投喺香港永遠消失,當奴當然唔想好似老懵董咁23條衰收尾,於是咪叫全宇宙最厚顏無恥既林公公搞掂佢.

林公公當然依足特衰政府推行惡法3部曲:
1. 先推出一個超爛,一定俾人炳既方案,仲要講到冇彎轉;
2. 等激起民怨之後作出少少讓步:"嗱,我已經聽左你地意見喇";
3. 一眾保皇黨禮義廉即刻出黎舉腳支持從而向巿民洗腦:"已經好過原先嗰個方案喇,大家接受啦".
當年政改甚至最近既財政預算案就係咁樣蒙混過關!!

於是林公公照辦煮碗:
1. 五區公投投票率低,等於巿民唔支持補選,所以以後都唔好嘥錢補選喇,直接由落敗嗰啲候選人"替補"一個上去啦!
2. 嗱,本來係由第二個黨既落敗候選人補上去,依家我讓步喇,由同黨既落敗候選人補上去啦!
3. 禮義廉:"已經好過原先嗰個方案喇,大家接受啦".

林公公,請你唔好再侮辱我地智慧啦!
- 公投同補選根本係兩回事,唔支持公投並非等於唔支持補選!
- 依你既邏輯,假如所有選舉既投票率都低於50%,係咪代表大多數巿民都唔支持民主選舉,即唔支持民主,以後都慳番d錢唔搞選舉唔駛選,直接好似阿爺咁委任d高幹子弟??!
- 你既支持度夠長期遠低於50%,咁你係咪應該自動落台,等我地瓜分你d人工啊??

再一次重申,唔投票並不等於唔支持選舉!!!所有民主國家都係一人一票去選政府官員,選舉投票權豈能褫奪替補??當然呢d情況只會喺奉行偽民主既香港發生,假如喺美國,林公公一早就俾選民一人一票罷免落台啦!!

仲有,當選就係當選,落選就係落選,從來都冇聽講過落選可以替補當選既?!假如係咁,阿豬阿狗都去選啦,學林忌話齋,只要你做低得票高過你嗰幾個,分分鐘咪輪到你替補上去??仲有,基本法唔係大晒,冇講"唔可以"並不等於可以做,假如樣樣野都要寫落去就唔係"基本"法啦!!

屎始終係屎,就算你話"已經糝左砂糖應該甜d架喇",都改變唔到佢始終係一嚿葾崩爛臭既屎既事實!!